Pethi Sumarcocot Mati

Senèn wingi, Sumardy Ma dadi kembang lambé. Juragan Buzz & Co. iku gawé ontran-ontran ngirim pethi marang para priyayi kang kawentar ana ing donya Internèt, kamangka kabèh isih sugeng, meger-meger. Karepé golèk pangalembana, jalaran rumangsa duwé panemu jitu, jaré ilmuné sing diarani kemalan cocot luwih unggul tinimbang ilmu dodolan cara konvènsional.

Pethi sing wis dicepakaké ana satus cacahé, ukurané kanggo bocah umur rong taunan. Ora baèn-baèn, anggoné ngirim nggunakaké montor ambulans, sing mesthiné mung kanggo ngangkut wong lara utawa mayit. Pancèn durung kabèh dikirim, nanging pokalé Sumardy wis gawé gègèr Jakarta. Apa manèh, ana pirang-pirang pejabat kantor redaksi media massa dikirimi.

Sumardy mbokmenawa pancèen wis kebacut mati rasa, utawa malah ora duwé utek. Sanajan ana tulisan kang mbarengi pethi-pethi iku, sing nyethakaké karepé, nanging wong sing nampa pethi lumrahé padha tratapan. Saumpama sing dikirimi duwé lara jantung banjur nggeblag lan njalari jenaté, mesthi angèl digambaraké kaya ngapa sedhihé kulawargané.

Tumrapé wong Sala, apa sing ditindakaké déning Mardy iku klebu tumindak asu-asunan. Ya, asu-asunané Sumardy! Sumardy sing uteké ana dhengkul, mati rasa jalaran ora duwé tepa salira. Nggawé cilakané wong liya, mung kanggo umuk kepinterané dhéwé, kamangka panjangkané mung arep dodolan buku. Pamrih laris, olèh bathi akèh, lumantar gawé ontran-ontran kang aèng-aèng.

Coba saumpamané ana pawongan sing serik jalaran olèh kiriman ora mutu, banjur nggolèki alamat kulawargané, banjur dikirim ambulans nguing-nguing ngangkut pethi mati saukuran awaké Sumardy, banjur kaya ngapa rasané kulawargané?

Iku kang arané wong keblinger. Rasa kamanungsan disisihaké mung sadrema golèk wah, kamangka tundhané mung olèh pisuhané wong akèh. Muga-muga, dongané wong sing keganggu pokalé Sumardy padha mandi, kinabulaké déning Gusti Pangèran Kang Maha Kawasa, supaya paling ora setaun mbésuké, ora ana wong mara njaluk tulung ngecakaké ilmu marketingé. Saumpama ana, muga-muga sing teka Nyi Rara Kidul, Wéwé Gombèl, Glundhung Pringis lan Suster Ngésot.

Aku percaya, bangsané Nyi Rara Kidul tumekané Suster Ngésot uga butuh citra anyar, perlu rébranding, supaya ora dianggep memedi. Saèlèk-èlèké Suster Ngésot lan Wéwé, dhèwèké butuh diajèni, butuh dianggep makhluk sing apik-apik, lan pantes disanak. Apa manèh nèng Indonésia, sing arané sétan wis genah kalah ala yen ditimbang, dibandhingaké lawan politisi, hakim, pulisi lan jaksa korup. Kabèh sétan, mesthi padha isin, gèngsi yèn dipadhakaké èlèké marang kelakuané Nazarudin, Nunun lan Sumardy.

Saliyané Sumardy, sing uga nggathèli yaiku para buzzer, yaiku tukang nggedebus sing uripé mung tansah kanggo ngawula bandha. Paribasan ora ana bédané, antarané buzzer lan inthuk utawa thuyul, sing seneng nyesep lan nyolong rejekiné liyan kang padha tandang gawé kanthi ngetokaké kringet.

Sumardy lan buzzer, ora ana bédané, luwih ala tumindak lan atiné tinimbang memedi. Wong-wong kaya mangkon sejatiné sing luwih pantes dilebokaké pethi mati, dikirim menyang jaratan.

Muga-muga, pulisi paring paukuman sing trep marang tumindaké Sumardy lan buzzer sing nyengkuyung anané ontran-ontran, gawé gègèr lan ngganggu katentreman. Ora kétang sedina-rong dina, pantes diukum, bèn bisa ngrasakaké yèn kekuwatané word of mouth, kemalan cocot iku uga bisa ngirim wong-wong culika mangkono menyang sajroning mbui. Wong-wong sing ngawula bandha lan bayaran nganti téga tumindak nista ora pantes dibéla.

Modar cocotnya…!

Dakkira isih akèh cara kang luwih becik, sanajan nggunakaké pethi kanggo pralambang. Kadho wujud pethi sing gedéné saukuran kothak tisu, umpamané, wis cukup kanggo mujudaké panemu utawa gagasan sing déning sapérangan pawongan nyebut out of the box, ora mung kaya kodhok ana sajroning bathok mengkurep.

Nanging, kabèh wis kebacut. Gagasan kaya mangkono mung diduwèni wong duwé utek lan bisa pétung, tur ora mati rasa kaya Sumardy lan wadya bala buzzer kang ngawula bayaran. Nyatané ana salah sawijiné kanca tukang nge-buzz malah prèngas-prèngès, sajak seneng yèn tumindaké kasih nggawé gègèr wong akèh. Nanging ya piyé manèh, nyat padha asuné, mula tumindaké ya asu-asunan. Sing wigati olèh bayaran, olèh dhuwit. Muga-muga waé bukuné ora akal payu…….

13 thoughts on “Pethi Sumarcocot Mati

  1. Wis ora urus tenan, landhep dengkul pamikire….
    umpama sing dikirimi ora trima banjur nggrudhug nggawa bala, rak malah kojur… jan, ora mutu babar blas..

  2. Lha iki tulisane opo Pakdhe, aku dewe seng ngerti ora iso. Ora pernah mboco koyo ngene 😀
    Wes,… peti mati ne podo koyo postingane Paman Tyo? Oalaaaah,… karepe wong edan!

  3. asuuuuu… tulisane apik tenan…
    setuju pakdhe…

    Dakkira isih akèh cara kang luwih becik, sanajan nggunakaké pethi kanggo pralambang. Kadho wujud pethi sing gedéné saukuran kothak tisu, umpamané, wis cukup kanggo mujudaké panemu utawa gagasan sing déning sapérangan pawongan nyebut out of the box, ora mung kaya kodhok ana sajroning bathok mengkurep.

    ide ne apik, tapi nyat yowes kebacut..hehe

  4. DV

    Cen asu, itu orangnya..
    ketoke kakean nongkrong neng coffee shop khas kapitalis dadi idene nganeh2i koyo ngono kuwi… *bakartokonya! 🙂

  5. aku kok curiga iki bagian seko order pasiene pakdhe? dinggo ngalihaken perkoro sing lagi panas saiki.. ah apapun lah.. pokoke modar cocote.. dadi kelingan Hastag #mdrcct

  6. Niesdri Welsh

    Aku ki kok malah bingung moco iki. KAREP-e Sumardy ki opo ta? Ora nalar tenan arep launching buku nganggo coro (nganti bingung dewe aku sing arep ngarani wong iki) “Mental Problem” (mental disability)yen coro kene. Goblog opo malah ra genep?? Terus isine pethi kuwi opo? Lha arep golek kondang opo men payu bukune???? SENSASI ra maton!

Leave a Reply