Séjé Silit Séjé Anggit

Aku seneng karo unèn-unèn lawas iki: Ésuk témpé, soré dhelé lan séjé silit, séjé anggit. Sajaké trep marang kahanan saiki. Tembung makelar kasus, garong Bank Century, muktamar NU wis cetha wéla-wéla nuduhaké sasmitané.

Isih kelingan gègèran baya arep ‘nguntal’ cecak, ta? Wektu semana, Pak Susno dibéla pol-polan déning kanca-kancané sasami pulisi. Ora mung nalika Pak Susno adhep-adhepan marang rakyat sing béla asih marang KPK, para jéndral pulisi uga ndèkèngi priyayi siji kuwi ngadhepi para jaksa.

Saiki piyé nyatané? Ésuk dhelé, soréné wis dadi témpé. Sésuké, mbokmenawa wis dadi ta*! Saiki, sing arané Ssusno Duadji wis kaya ora aji tumrapé sapérangan pulisi.  Ora mung lungguhané sing diprèthèli, sikilé uga di-amputasi. Wis salumrahé wong anyel, dianiaya kanthi caran diwirang-wirangaké, banjur aras-arasen mlebu kantor. Ééé…lha kok undhuh-undhuhané didakwa nglanggar dhisiplin.

Sajak durung entèk anyelé, Pak Susno banjur miyak wadi para pulisi. Dikandhakaké menawa ana sapérangan jéndral pulisi padha makelaran kasus utawa perkara (sinebut markus), saperlu supaya bisa mèlu bancakan dhuwit pajek, sing jaré Rp 25 milyat akèhé.

Jiann… gayeng tenan rekiblik iki. Kabèh umyek. Layang kabar lan tipi banjur kaya pitik pethuk ta*, cepet-cepetan nyaut lan gedhèn-gedhènan siyaran. Apa manèh bareng pulisi malah mriksa Pak Susno, ora ndhisikaké nyidik perkara. Tambah ramé, sansaya ndadra.

Saiki, wong sakarat-arat dadi lali perkara garong Bank Century. Sapa sing nguntal ora cetha, malah saiki Robert Tantular (sing wingi-wingi didakwa nilep dhuwit nasabah) malah gawé nggugat sing dianggep ngundhat-undhat. Sapa sing salah, sajaké ora bakal sèlèh. Awaké dituwak nganggo cagak, lan cagaké wujud gendruwo. Dadi, ya padha wedi, ora ana sing wani (mbokmenawa tinimbang mati).

Sing jenengé miyak perkara, jebul ora gampang. Bisa dirasa, nanging ora kasat mata jalaran akèh pedhut sing ngaling-alingi. Lan manèh, pedhut mau sajaké digawé déning para-para buto lan gendruwo sing gedhéné ngédap-édapi. Lagi mbayangké waé wis mrinding, apa manèh yèn nganthi adhep-adhepan.

Ora mung ana ing perkara colong-colongan dhuwit sing mambu-mambu panguwasa, rebut kuwasa uga kedadèyan ing laladan para ngulama. Nèng Makassar kana, jaré Pak Hasyim Muzadi krenteg banget mimpin NU. Yèn wingi wis bisa kuwasa nggèrèt NU ngalor-ngidul, klebu kanggo dèkèng nyalon wakil presidhèn bareng Megawati, saiki mburu kuwasa dadi gegedhugé NU.

Rékaké, pingin ‘nyingkiraké’ Mbah Kiai Sahal, lali marang adab para ngulama, ora olèh umuk kabisan lan kapinteran. Apa manèh, sing kaya mangkono ora becik kanggo tuladha marang santri lan rakyat.

Ning arep kepriyé manèh, wong anggité Pak Hasyim bisa majokaké NU kanthi cara rebut kuwasa. Yèn kersané para ngulama, NU kuwi aja nganti gluprut regetan dosa politik, mula isih padha ngersakaké Mbah Sahal jumeneng mandhégani NU. Muga-muga waé kabar sing dakkrungu kliru, menawa Pak Hasyim nggunakaké cara dhedhuwitan kanggo nglèngsèr Mbah Sahal.

Muga-muga, akhlak-é Pak Hasyim isih kiai, dudu politisi… Semono uga tumindaké Pak Susno wingi-wingi, muga dudu jalaran pamrih kuwasa utawa mbéla sing lagi nyandhang kuwasa..

ngAlkamdulillaahhh…. mung kacèk limolas menit sawisé tulisan iki kapacak, wis ana kabar nyenengaké: Mbah Kiai Sahal Mahfudz kapilih manèh ngesuhi NU. Gusti Allah ora saré, ora marengaké Éndhonésa bubruk jalaran NU-né remuk.

4 thoughts on “Séjé Silit Séjé Anggit

Leave a Reply