Baya Mungsuhi Cecak

Dhagelan paling kekel taun iki mung ana siji: baya sumbar, bengok-bengok ngécé, nantang cecak. Rumangsané, para cecak bakal wedi, gigrig ngadhepi kéwan sing awaké cringih-cringih kuwi. Sing luwih nggaplèki manèh, baya-baya kuwi duwé penganggep yèn cecak iku mujudaké sawijining jinis kéwan sing paling pantes dimungsuhi.

Bola-bali baya bodho, ora éling ngendikané Bung Karno: Jas Mérah! Jangan sekali-sekali melupakan sejarah, aja tidha-tidha wani nglalèkaké sujarah uripé. Coba dipikir, cecak kuwi tau ganggu gawé apa marang baya? Uripé waé ana ndhuwur, embuh pènèkan tembok utawa mbrangkang ana ngepyan. Wedi marang banyu, mangané prasasat mung sadrema ngentèni lénané lemut léda-lédé, mabur sinambi ngalamun.

Déné sing arané baya, wis suwé kondhang dadi kéwan murka. Donyané ana loro: ana banyon, uga ana ing ndharat. Nguntalé énak-énakan, sarwa daging, malah yèn perlu mangan manungsa sing léna. Saben lagi ana ing kali utawa rawa, matané thok sing diketokaké. Perluné, kanggo nylamuraké kéwan lan manungsa, supaya ora wedi, lan yèn ana sing léna, banjur dikemah-kemah, digawa nyilem ana njero banyu.

Lagi disawang saka carané langèn waé wis nuduhaké yèn niyaté pancèn ala sakawité, apa manèh yèn dipétani patrapé siji mbaka siji. Mata mecungul ana ndhuwur banyu supaya bisa nyawang sakiwa tengené, kanggo milahaké endi sing kudu dimangsa lan endi sing kudu disanak. Dhasar baya…..

Ana ndharat semono uga. Senengané éthok-éthok ndhelik, awaké didhelikaké ana runggutan, yèn perlu mblusuk ana ngisor godhong-godhongan, supaya sapa waé sing liwat ora nggraita bakal ngadhepi bebaya.

Coba, apa karepé unèn-unèn “Cecak kok kumawani nantang Baya”, yèn dudu awit saka kersané Gusti Allah arep mirang-mirangaké, miyak wadi lan nisthané tumindak para baya sasuwéné iki?

Saumpama priyayi-priyayi iku pinter, mesthiné ora nganggep awaké dhéwé baya. Luwih trep yèn dhèwèké ngaku macan lan ngarani mungsuhé iku kucing. Wujudé ora pati béda, kodraté ya cedhak, nanging daya lan tenagané luwih ngédap-édapi. Lha yèn baya mungsuh cecak? Genah béda adoh….. (ning embuh yèn sing dikarepaké iku pancèn kodraté baya édan, sing seneng ngrayah donyané liyan)

Para baya iku, sajaké lagi mendem gèlèk, mula nggawé tembung lan ngarani mungsuh waé kanthi ngèkèk-ngèkèk. Utawa nembé kakèhan mushroomdabiyud, mula utek warasé kelaut. Yèn ora, sok-sok malah kakèhan ngobong pete utawa sabu-sabu, mula banjur paranoid, nyawang cecak waé rasané kaya ngadhepi baya raseksa, sing luwih medèni. utawa

Coba para baya mau éling ngendikané Bung Karno, dhèwèké mesthi kelingan sejarah urip mbah-mbahé mbiyèn. Sasekti-sektiné Mbah Baya mbiyèn, sanajan 40 cacahé, bisa diapusi marang wong siji sing arané Jaka Tingkir. Yèn bangsané jinisé sato-kéwan, sing bisa ngalahaké baya, ora liya ya mung kancil.

Mula, yèn nganggo unèn-unèn Jas Mérah mau, mungsuhé baya mung loro: anak turuné Jaka Tingkir lan keluwargané kancil. Dudu cecak!

(wis, awaké dhéwé dadi manungsa ora usah mèlu mumet ngéling-éling perkara Bank Century utawa gègèran BI lan LPS. nyawang saka kadohan waé, kaya ngapa solah tingkahé para baya)

15 thoughts on “Baya Mungsuhi Cecak

  1. “Mula, yèn nganggo unèn-unèn Jas Mérah mau, mungsuhé baya mung loro: anak turuné Jaka Tingkir lan keluwargané kancil. Dudu cecak!”

    ora setuju…
    baya yen di timbun cecak sak ton opo yo ra modyar ???
    njur sing dari masalah,, sopo sing gelem ngumpulke cecak sak ton… heheheh…

    salam kenal pakdhe..

    salam kenal kembali, Mas Lawa. umpama awakmu wae sing ngumpulke cecak-cecake piye? tapi aja crita sapa-sapa, ben baya ora duwe wektu rapat konsolidasi…. baya nglumpuk sewu, cecak mung sak ton mesthi kalap kabeh…
    /blt/

  2. sing menang mengko sopo???? digawe totoan penak koyone…

    totohan itu yen yakin padha kuate… lha iku mengko sing menang sing ora ketok, jare… sapa? sing menang jenenge setan! (alias ki dalang)
    /blt/

  3. Hmm hmm ojo nggunakno sanepo kewan sedulur2 ! Nek arep golek wong ju2r yo angel ing jaman edan iki. Ju2r memang mahal dan LANGKA saat ini. Ini sbtulnya bukan dagelan bukan lawak, mreka hanya pr pemain yg memang hrs spt itu. Tp ngomong2 mesti ono dalang ing kahanan ky mau kuwi ora?(mugo2 ra ono) la nek ono dalange, ya kuwi mau jenenge dagelan. Oh.. indonesiaku sayangku Hati2 ada bu_** ngamuk

    saing dadi dalang jenenge setan gundul. dudu dagelan…..
    /blt/

Leave a Reply