Gelaré S-2, Gawéyané Ider Cangkem

Nyambut gawé ora perlu isin. Aja pilih-pilih, yèn ora pingin disingkiri déning rejeki. Gusti Allah ora dhemen marang umaté kang lali marang syukur. Mula, urip iku kudu tansah narima, samadya, ora perlu ngangsa.

Gambar kiwa, Titus ana kiwa. Semono uga ana gambar tengen, Titus ana tengen.

Gambar kiwa, Titus ana kiwa. Semono uga ana gambar tengen, Titus ana tengen.

Gusti Allah wis maringi tuladha kanggo kita sadaya. Titus arané, Titus Clurut celukané. Priyayi siji iki bisa dadi tuladha, jalaran ora tau gawé gela-pituna marang wong liya. Ènthèngan yèn wis tandang gawé, semono uga babagan polahé lambéné. Lunyu, gecul, tur ngangeni. Mula ora gumun yèn para wanita, sing isih legan utawa sing wis kakèhan momongan, padha kepencut marang dhèwèké.

Kabèh mau, mujudaké tresnané Gusti marang kawulané. Sregepé mulang nulis marang bocah cilik-cilik, pranyata dadi dalan rejekiné lan nuwuhaké èksistènsin-é, yaiku mulang wuruk, minteraké para calon sarjana. Coba padha dipikir, pira sarjana senirupa kang bakal lair banjur mèlu ngowahi Éndonésa limolas tekan selawé taun mbesok?!?

Sepisan-pisan, aja ndakwa aku ngumukaké Titus. Wani botohan, tinimbang kanca-kanca sakantoré sing padha jejuluk dhosèn, Titus mesthi kalebu wong sing paling akèh wacanané. Dudu jalaran duwé akèh buku, nanging pancèn mbiyèn akèh ngangguré banjur digalaki sinauné, mula nganti ditinggal lunga sir-sirané. (Lha piyé, wong bocahé njaluk diterké menyang Grand Mall, dhèwèké ora gelem. Alesané, saba papan mangkono iku bisa nglunturaké intelèktualitas-é. Diajak nonton pilem, jaréné ményé-ményé. Anèh tenan pokoké)

Sing marakaké bombong atiku, atasé wis S-2, yaiku gelar master ana donya akademis, dhèwèké isih gelem nandangi gawéyan apa waé. Ora isinan, ora t*mpikan! Kamangka, ana kampusé dhèwèké, gelar master iku kalebu peng-pengan. Gelar iku wis bisa njalari wong mlaku ndegèg. Tenin!

Nanging, sing jenengé Titus pancèn priyayi blatèr, bener-bener down to earth. Dhèwèké ora kemlinthi dumèh wis duwé gelar master, malah saiki kepara laris ider cangkem. Nyéwakaké lambé, lan ngamalaké kepinterané. Ngocèh ana ngendi waé, nglipur atiné kanca lan dhayoh.

Coba dibandhingaké marang kanca-kancané sing duwé gelar Master of Humaniora/MHum, Master of Arts/MA, Titus mesthi isih kalebu paling apik. Gelaré ora baèn-baèn. Sinauné abot, perlu akèh maca lan srawung supaya jembar wawasané. Ora mung tiori, ngèlmu kang siji iki remasuk (nyilih istilahé Mbah Basiyo) paling dinamis: gampang owah miturut kahanan kang kalakon. Telat srawung bisa nyumpet dalan rejeki, bisa uga njalari pati, amarga sing nduwèni gelar bakal katon kethul, kélangan gecul.

Yèn aku, cetha wis ngerti njaba-njeroné Titus, remasuk saka ngendi dhèwèké éntuk gelar kang ngédap-édapi iku. Mung lali jeneng universitasé, nanging cetha yèn gelaré iku saka Énggrés! Uniné gelar iku mangkéné: Master of Ceremony, yèn dicekak dadi MC. (Bakuné, kabèh master iku mesthi S-2. Déné yèn S-3 iku arané doktor utawa Pi Eij Dhi, PhD)

Lha yèn gelaré Titus apa? Sangertiku S-1-né Senirupa, cekakané SSn lan master-é wis cetha wéla-wéla. Dadi, aja lali, yèn ngaturi sedhahan utawa undangan, tulung digatèkaké kang pratitis: Sdr. Titus, SSn, MC.

(Titus paling ora bisa nampa seratan kang kerep kapacak ana amplop ulem kang uniné mohon maaf bila ada kesalahan penulisan alamat, nama dan gelar. Kanggoné dhèwèké, kang mangkono iku mung garan pancing. “Alesan!” ujaré Titus)

One thought on “Gelaré S-2, Gawéyané Ider Cangkem

Leave a Reply