Kopi Kanggo Donny

Rasané wis ora kuwat manéh yèn bengi ini, Donny kudu kelap-kelip ijèn ana kamar indekosan. Apa manèh, sésuké wis ngancik dina prèi, kanca-kancané mesthi padha mulih ana asalé dhéwé-dhéwé, kumpul manèh karo keluargané. Setengah taun sepisan, para mahasiswa iku duwé dina lèrèn rada tutug. Ora ana kuliah, ora mumet nggarap tugas saka dhosèné.

Sing luwih marakké gemeter manèh, bengi ini pinuju malem minggon. Kaya adaté, kanca indekosané Billy Joell de Franco, bulé peteng saka New South WATES, mesthi pesta dhéwé karo gandhèngané, putri Ngayogyakarta. Biyas, kang wingi-wingi isih bisa diajak ngancani saben krasa sepi, saiki uga wis payu. Dhèweké runtang-runtung terus karo pacaré, sing diakokké sedulur dhéwé, ujaré putrané pakliké.

Sirahé Donny tambah abot. Saking anyelé, Setu bengi banjur diarani Malem Minggu Jahat, MMJ. Jahat, sabab saben ngancik bedhug Ngisak, akèh nom-noman, lanang-wadon padha dlèdar-dlèdèr liwat ngarep indekosané. Ana sing numpak honda, péspa, uga ana sing mlaku gandhèngan tangan utawa rangkul-rangkulan. Mesra, malah siji-loro mboncèngé kepara rapet, tangané nyetut. Yèn wis ngono kuwi, pikirané banjur mlayu tekan ngendi-endi, lan ora kliwatan banjur kelingan kopi gawéané Siti Sumringah.

Ya, pancèn trep karo arané, Siti pancèn tansah sumringah. Ora duwé nesu, anané mung kebak èsem lan ngguyu. Mula, sejatiné ora mung Donny kang tresna kepati-pati. Lik Gentho, juragan sinyal saka Watukelir, Sukoharjo waé uga tiba tresna marang Siti Sumringah, bakul klasa mendhong saka Kertosono. Kamangka, Lik Gentho lagi krungu critané babagan Siti Sumringah saka Gajahabuh, kanca kopdar utawa kopi daraté Siti ana wétan Pasar Kertosono, kira-kira satus mèter saka kios klasané Siti.

Lik Gentho sing wis duwé bojo pancèn ora ngarah utawa nduwèni karep kanggo mbojo Siti kaya Donny. Mula, saben mbuka blog-é Siti, sing disawang mung gambar urip, vidiyo asil sutingané Donny sing wis dicènthèlaké ana YouTube lan di-link ana blog. Saka kana, pancèn katon luwes anggoné nglayani wong-wong kang padha nganyang rega klasané. Diladaki waé mung klècam-klècem, ora nesu, mula dagangané laris tenan, malah dadi jujugan kanggo kulakan.

Mbokmenawa, Donny pancèn wis lali, utawa malah wis kebrongot atiné sabab saben nyawang Siti, dhèwèké banjur kelingan Sumarni, tanggané dhéwé. Anaké carik désa Kebon Roso, Sragèn iku mèh waé dadi sisihané Donny sadurungé ilang tanpa kabar tumekané saiki. Loro-karoné wis ring-ringan utawa tukar cincin.

Wektu iku, tahun 1998, Sumarni kerep mèlu demonstrasi nggoyang Soeharto. Ora mung ana Sala, dhèwèké uga kerep nglurug tekan mBandung, nJember, Jakarta utawa Lampung. Sadurungé soeharto lèngsèr, Sumarni ilang kaya diuntal dhemit. Saben mulih Sragèn sawisé demonstrasi, Sumarni mesthi nggawé kopi. Pancèn enak rasané, mula tumeka saiki, Donny ora bisa lali.

Ya jenengé ndilalah, mbareng Donny kenal blog, sawetara wektu bisa kanggo nglalèkaké Sumarni. Apa waé kang dialami, dirasakaké lan disawang, kabeh banjur ditulis ana blog-é. Ana donya blogosphere, kancané Donny tambah akèh. Ngayogya, mBandung, Semarang, Surabaya lan Kertosono kalebu kutha-kutha kang kerep disambangi Donny. Ana Surabaya, setahun kepungkur iku sepisanan Donny ketemu Siti. Dhasaré sumèh lan grapyak kaya Sumarni, Donny jatuh hati, yaiku tembung ceblok dhemen kanggoné nom-noman jaman saiki.

Saka Surabaya mampir Kertosono, Donny mampir omahé Siti. Ya ana kana iku, Donny disuguh kopi gawéané Siti, sing njalari Donny ora bisa lali tumekané saiki. Piyé nasibé Sumarni, Donny malah wis lali.

Sing diéling-éling mung janjine Siti. Ujaré, Siti arep dolan menyang Sala nyambangi Donny suk yèn wis ganep sesasi saka ketemuan sing wingi, kang tibané ana dina-dina iki. Mula saben wengi, watara jam sanga nganti esuk, dhèwèké thenguk-thenguk ana ngarep PMI, ngentèni ana bis Sumber Kencono utawa Eka PATAS dirém banjur ngudhunaké penumpang siji.

Janjiné Siti, dhèwèké bakal budhal numpak bis ing antarané jeneng loro kuwi, Sumber utawa Eka, sawisé nutup tokoné salebaré bedhug Ngisak. Donny terus nganti-anti tumekané Siti. Kangen digawèkaké kopi.

Satengahé nglamun amarga nglangut, Donny njenggirat. Telpune kedher. Ditiliki, jebul ana SMS saka Siti. Mas Donny, sepurané ya… Ojok dilebokno atiné sampéyan, lèk aku gak bisa budhal ndhèk Solo bengi iki. Aku katé mèlok kopdar ambèk arèk-arèk Malang nèng nggoné mBlimbing bengi iki. Mené aé, teka Malang aku langsung budhal nèng nggoné Solo ketemu awakmu, numpak sepur Gajayana. Kangen juga, sih…. Luv U

Donny bungah. Sanajan SMS-é Siti rada gawé getun, nanging isih mènèhi pengarep-arep. Ngguya-ngguyu dhéwé, Donny mulih nèng indekosan: gawé kopi, nerusaké ngetik sekripsi. “Malem Minggu wis ora jahat karo aku,” mangkono gunemané Donny. Ijèn ana kamaré. Joell lan Biyas, padha lagi seneng-senengé, ngekep bocahé dhéwé-dhéwé.

3 thoughts on “Kopi Kanggo Donny

Leave a Reply