Pokalé Suhir

Aku duwé kanca, jenengé Suhir. Nakalé ora lumrah sanajan umuré wis nyèketan. Nyilakaké kanca wis kerep, nanging ora bisa gawé nesuné liyan. Aku nyebut kabèh tumindaké nganggo istilah kenakalan yang tulus. Kenapa mangkono, jalaran Suhir mesthi mèlu ngalami rekasa utawa cilakaning kanca liyané.Pernah, tengah wengi dhèwèké sambat wetengé luwé. Kanca-kancané digugahi, diajak golèk sega. Iming-imingé, bakal padha dibayari jajané. Karo mlaku lan crita ngalor-ngidul, ngerti-ngerti wis kadohan parané. Saben ditakoni mangan ana ngendi, jawabé Suhir padha terus: sik, ngarep kono! Kojuré, mangané ya mung ana pojok Té-Bé-èS, ora adoh saka papan turuné kanca-kanca mau. Kamangka, mlakuné ana rong kilo luwih, ngubengi kampus UNS lan STSI.

Mata padhang, weteng luwih krasa nglikik, sikil wis mesthi ngethok-ngethok. Mangan pancèn krasa énak, mula padha télap-tèlep nganti entèk sega kucing pirang-pirang wungkus. Suhir paling seneng nyawang kancané olèhé madhang kanthi ndemenaaké.

Liya wektu, Suhir ngajak Klombrot thenguk-thenguk jejagongan. Wektuné mèh jam siji, ngepasi malem Jemuah Kliwon. Klombrot kang jirihé kepati-pati ditakoni apa larah-larahé dhèwèké duwé rasa wedi, phobia marang petengan. Rumangsa dikancani lan digatèkaké, Klombrot crita sakèh-akèhé. Wis setengah jam suwéné, Suhir pamit nguyuh. Karana wedi, Klombrot melu ngetutaké.

Suhir golèk panggonan nguyuh ana sacedhaké gedhung badminton. Jebul Klombrot uga mèlu nguyuh sisan. Satengahé nguyuh, Klombrot ditinggal nyingkir. Mlakuné alon-alon, Suhir banjur ndhelik. Klombrot bengok-bengok kewedèn. Ana limang menit suwéné, Klombrot dinengké waé, sanajan bengok-bengok nganti gerok.

Suhir banjur mecungul. Klombrot nesu, rumangsa diwedèn-wedèni. Sebab sadurungé budhal nguyuh, Suhir nyritaaké yèn Té-Bé-èS rada angker. Ana dhemit lan memedi liyané. Apa manèh, biyèn sadurungé dibangun gedhung Té-Bé-èS, wujudé isih bong, kuburan tuwa. Klombrot gemeter, lambéné ngèwèl.

Jawabané Suhir ya mung ènthèng waé: “Sorry, Mbrot. Dak pikir, kowé ngaku wedi iku mung guyon. Jebul tenanan, to?”

Ora mung Klombrot, Slamet uga naté dipacé. Awan-awan, Suhir ngajak Slamet lunga pijet. Senengané, Suhir pijet menyang panti pijet Énggal Tegang. Sajaké malah wis duwé girik lengganan barang kanggo golèk kortingan, wong yèn disawang, kabèh tukang pijeté padha grapyak semanak marang Suhir. Dhèwèké milih dhisik, banjur mlebu mbilik kordènan.

Bareng Slamet uga wis mlebu, Suhir metu manèh, banjur golèk bilik sing jèjèran karo biliké Slamet. Sawetara wektu ora krungu wong jejagongan utawa gojègan, Suhir ngadeg ana sandhuwuré dhipan. Tangané sedheku ana ndhuwur tripleks kang gunané pancèn kanggo nyingget, kanggo gawé kamar utawa bilik cilik-cilik. Saka ndhuwur, Suhir nyawang lan ngematké tumindaké Slamet.

“Met, awit mau kok mung ngono kuwi thok, to?”

Slamet njenggirat. Kagèt rumangsa didingkik. Mbak-mbak tukang pijeté mung nyekikik…

Leave a Reply